Asar Ka Waqt Hai Shabbir Ki Ati Hai Sada
Choor Zakhmon Sy Badan Ho Gya Amma Mera
Apni Aghosh Mein Ab Mujh Ko Chupa Lo Amma
Ary Dhoop Hai Apni Abaa Aan Ky Dalo Amma

Garm Raiti Py Main Girta Hun Sambhalo Amma

Thak Gaya Lashen Utha Kar Main Bhary Lashkar Ki
Lash Qasim Ki Main Laya Hun Kabhi Akbar Ki
Khud Banai Hai Lehad Mainy Ali Akbar Ki
Do Tasalli Mujhy Seenay Sy Laga Lo Amma

Garm Raiti Py Main Girta Hun Sambhalo Amma

Teer Talwar Sy Khanjar Sy Badan Zakhmi Hai
Khak Jalti Hai To Zakhmon Mein Chubhan Hoti Hai
Mery Zakhmon Sy Mery Dill Ka Laho Jari Hai
Apni Chadar Ko Mery Zakhmon Py Dalo Amma

Garm Raiti Py Main Girta Hun Sambhalo Amma

Mery Abbas Khafa Ho Gya Amma Mujh Sy
Woh Nahi Aya Utha Laya Tha Bazo Us Ky
Aap Ek Kam Karein Nehr Kanary Ja Ky
Mery Roothy Huye Bhai Ko Mana Lo Ja Amma

Garm Raiti Py Main Girta Hun Sambhalo Amma

Chakkian Peesi Hain Goudi Mein Bitha Kar Mujh Ko
Jagti Rehti Thiin Zanoo Py Sula Kar Mujh Ko
Lorian Deti Thiin Jhoolay Mein Jhula Kar Mujh Ko
Is Dafa Goud Mein Phir Apni Sula Lo Amma

Garm Raiti Py Main Girta Hun Sambhalo Amma

Aur Kuch Dair Ka Mehman Hun Tum Pas Raho
Rait Zakhmon Mein Hai Anchal Sy Usy Saf Karo
Ati Hai Rony Ki Awaz Sakina Dekho
Jao Tum Ja Kay Sakina Ko Sambhalo Amma

Garm Raiti Py Main Girta Hun Sambhalo Amma

Dekho Woh Aag Lagi Sham E Ghareeban Aai
Dekho Ghabra Ky Nikal Aai Meri Maan Jai
Dekho Behosh Sakina Ka Parha Hai Bhai
Jao Sajjad Ko Shoalon Sy Nikalo Amma

Garm Raiti Py Main Girta Hun Sambhalo Amma

Hai Guzarish Meri Tum Sy To Ab Itni Madar
Amma Baba Ki Qasam Dhaanp Lo Munh Par Chadar
Dekha Jaye Ga Na Ab Tum Sy Yeh Khooni Manzar
Qatal Hota Hun Nigahon Ko Hata Lo Amma

Garm Raiti Py Main Girta Hun Sambhalo Amma

Ho Gi Jab Hashar Ky Maidan Mein Majlis Barpa
Farsh E Gham Sheh Ka Bichayen Gi Janab E Zehra
Aaye Gi Hazrat E Shabbir Ki Rehan Sada
Aaj Jee Khol Ky Tum Ashk Baha Lo Amma

Garm Raiti Py Main Girta Hun Sambhalo Amma

Share This Lyrics, Choose Your Platform!