Aa Asghar Bin Tere Main Chain Kahan Se Paon.
Aa Laut Ke Aa Ja Lal Tere Jee Bhar Ke Naaz Uthaon.

Meri Aankh Ka Tara Hai Tu Mujh Ko Jan Se Pyara Hai.
Maa Dukhyari Ke Jeene Ka Tu Hi Lal Sahara Hai.
Tujhe Chor Ke Tanha Maqtal Mein Main Kaisay Sham Ko Jaon.

Teri Woh Masoom Adaein Teri Yaad Dilati Hain.
Tere Pyar Ki Woh Sab Batein Mujh Ko Bohat Rulati Hain.
Main Teri Judai Mein Beta Ro Ro Ke Mar Na Jaon.

Loriyon Walay Yeh Tu Tere Naaz Uthane Ke Din They.
Aankhon Mein Teri Khushiyon Ke Khuwab Sajane Ke Din They.
Aa Laut Ke Asghar Aa Beta Tera Kurta Main Badlaon.

Bhool Nahi Sakti Maa Asghar Pyasay Hont Tere Beta.
Khali Gaud Hai Our Zindaan Hai Aa Ja Maa Ke Pas Aa Ja.
Aa Nanhay Mujahid Main Teri Ashkon Se Pyas Bhujaon.

Kitni Hai Be Chain Sakina Tere Naaz Uthane Ko.
Subha -o- Sham Tarasti Hai Woh Tera Dil Behlane Ko.
Teri Ladli Behan Sakina Ka Main Dil Kaisay Behlaon.

Share This Lyrics, Choose Your Platform!